CEBU, Philippines – Gipangkawat sa wala mailhi’ng kawatan ang mga butang sulod sa panimaye sa usa ka pharmacist sa Nonoc Homes Subdivision, Tabunok, Dakbayan sa Talisay niadto’ng Domingo sa udto.
Ang biktima nga nidangop sa kapolisan mao si Mary Joy Maranan, 35-anyos, dalaga.
Si PO3 Ferdinand Pablo sa Talisay City Police Station nagkanayon nga nibiya sa ilang panimaye ang biktima ug ang iyang pamilya niadto pang Huwebes aron iselebrar ang Bag-ong Tuig sa ilang kaparyentehan sa Lungsod sa Cordova. Apan sa ilang pagbalik, sila nakurat sa dihang nakita nga nagpasad na sa sawog ang ilang mga butang.
Nawagtang na ang Rose Gold MK nga relo nga kantidad og P16,000; duha ka Fossil nga relo nga kantidad og P15,000; Anne Klien bracelet nga P8,000; O+Air Phone nga P17,000; Nokia touch screen nga P6,000; Nokia qwerty pad nga P5,000; Cherry Android Phone P5,000; iPod nga P10,000; kwarta nga P3,000; gold nga ariyos nga kantidad og P12,000 diin ang tanan mokantidad og P97,000.
Si Pablo niingon nga ang mga kawatan nigamit og sanga sa kahoy aron tungtungan labang sa koral sa panimaye sa biktima.
Ang mga kawatan niligwat sa window grill dayon sulod sa balay.
"Murag nigamit ni og bata ning mga suspek kay gidak-on ra man sa bata ang masulod sa giligwat nila dayon mao na sab ni ang niabli sa laing suspek," asoy ni Pablo.
Dugang ni Pablo nga ang iro sa biktima ang pakyas sa pagbugaw sa mga kawatan tungod kay iya kini’ng gihulagway nga boutan.
Nagduda sila nga nakasuhito ang mga suspek sa panimaye sa biktima. – /GMR) (BANAT NEWS)