Motor gidumbol sa traysikol, tulo angol

CEBU, Philippines – Naangol ang tulo ka sakay sa motorsiklo human nidumbol ang usa ka traysikol sa Barangay Dumlog, Dakbayan sa Toledo.

Ang mga naangol mao sila si Ma. Lucena Ancajas, 27, minyo; Louise Ann Valles, 7, ug ang drayber sa motorsiklo nga si Cefrelle Ancajas, 22, pulos taga Barangay Poblacion, Lungsod sa Balamban.

Sa imbestigasyon sa Toledo City Traffic Section nasayran nga ang mga biktima nagpaingon unta sa Barangay Poblacion, Dakbayan sa Toledo apan pag-abot sa dapit nga nahitaboan, kalit sila nga gidumbol sa nagsunod nga traysikol hinungdan sa ila’ng pagkahagba ug pagkalukapa sa karsada.

Dali nga nakasibat ang traysikol nga nakabangga sa mga biktima kinsa dali’ng gipangdala sa Toledo City Hospital tungod sa naangkon nga mga samad ug bun-og sa kalawasan.

Apan ang drayber sa motorsiklo nga si Cefrelle gibalhin sa usa sa mga tambalanan sa Dakbayan sa Sugbo alang sa dugang nga medikasyon.

Padayon usab nga giila sa kapolisan ang drayber sa traysikol nga giingong nisibat. – /GMR) (BANAT NEWS)