Bayot nga bugaw gidakop

CEBU, Philippines – Usa ka 22 anyos nga bayot ang gidakop human gitumbok nga nibugaw sa tulo ka batang babaye diha sa usa ka bar nga nahimutang sa Barangay Pajo, Dakbayan sa Lapu-Lapu sa miaging Biyernes sa gabii.

Ang gidakop mao si Jojo “Carla” Sanchez, kanhi nagtrabaho sa usa ka karenderiya ug residente sa Barangay Labogon, Mandaue City ang gidakop sa police decoy sa Gun-ob Police Station 3 gawas sa bar sa Barangay Pajo.

Si Police Officer 2 Maria Filipina Branzuela sa Women and Children’s Protection Desk sa Gun- ob Police Station 3 nagkanayon nga gidala sa suspek ang tulo ka bata nga ang usa nag-edad og 14 nga taga Mandaue City ug ang duha 17 anyos aron mag-disco sa nahisgutang dapit.

"Ang usa ka 17, taga-Compostela, ang laing 17 years old kay taga-Consolacion," matud ni Branzuela.

Sa pakighinabi sa Banat News ngadto sa suspetsado, miangkon kini nga iyahang gibugaw ang mga bata  apan wala siya masayod nga mga menor de edad pa kini kay giingnan man siya nga 18 anyos na silang tanan.

"Sayop nako. Wala ko maanad ani, nakasuon ko ani sa akong mga amiga. Ingon sila nga 18 na sila," matud ni Sanchez.

Mibutyag ang suspetsado nga nakigtagbo siya sa mga minor de edad sa usa ka bar sa A.S. Fortuna sa Mandaue sa alas- 9 sa gabii human adunay "guest" nga mi-text kaniya sa alas 7 sa gabii, nga nangita og babaye.

Misakay dayon sila og taxi padulong sa laing bar sa Barangay Pajo, Lapu-Lapu  apan wala kini magtuo nga polis diay ang lalaking nikontak  kaniya.

Nakuha gikan sa suspek ang P9 mil nga budol money nga maoy gigamit sa kapolisan sa maong operasyon ug cellphone sa suspek.

Matud ni Branzuela, tulo ka buwan nilang gisunod-sunoran si Sanchez ug ang lain pa niining kagrupo nga namugaw og kababayen-an.

Ang mga batang na- rescue  gidala na sa Department of Social Welfare and Development sa Lapu-Lapu kagahapon sa buntag.

Si Sanchez nangayo og pasaylo sa pamilya sa mga biktima ug nagkanayon dili na siya mousab sa maong buhat.

Si Sanchez kasuhan og kalapasan sa Republic Act 10634 in relation to RA 7610.

Ang RA 10634 mao ang Expanded Anti-Trafficking in Persons Act samtang ang RA 7610 mao ang Special Protection of Children against Child Abuse, Exploitation and Discrimination Act. – /EIM) (BANAT NEWS)