CEBU, Philippines - Nadakpan sa buy-bust operation sa kapolisan ang “level 3 drug pusher” sa Ibabao, Tugbongan, Consolacion alas 2 pasado sa hapon niadto’ng niagi’ng adlaw.
Si Police Officer 1 Socrates Borinaga sa Consolacion Police Station niila sa nadakpan nga si Pedro Bercede Herodio, 33, nagpuyo sa mao’ng dapit.
Si Borinaga niingon nga namatikdan sa mga barangay opisyal ug mga molupyo ang nagkakusog nga pagpamaligya og shabu sa suspek hinungdan nga nagkadaghan usab ang mga adik sa mao’ng dapit.
Matud ni Borinaga nga ang ila’ng hepe nga si Senior Inspector Wilson Abot ang nimando sa pagpaniid sa ilegal nga kalihukan ug diha’ng natino nga positibo, dali nga giplano ang buy-bust operation. Si Borinaga niingon ang poseur buyer nga polis ang nakigsabot kang Herodio nga mopalit og shabu ug diha’ng gitunol ang usa ka gamay nga pakete bugti sa P200 nga buy-bust money, dali nga gisignit ang suspek.
Dugang ebidensiya nga nasakmit ang tulo ka pakete’ng shabu nga may timbang nga 11.19 gramo ug nasakmit usab ang tulo pa ka dagku-dagku’ng pakete. (BANAT NEWS)