CEBU, Philippines – Giaprobahan sa Ubos Balay-Balauranan ang balaudnon ni Kongresista Gabriel Luis Quisumbing sa paghimo’ng 100-bed gikan sa 50-bed capacity sa Eversely Childs Sanitarium Hospital sa Dakbayan sa Mandaue.
Lakip sa House Bill No. 6173 nga anaa na sa Senado nga giduso ni Quisumbing ang pagpalambo sa serbisyo ug pasilidad sa tambalanan.
Una’ng giduso ni Quisumbing ang HB No. 1545 niadto’ng Hulyo 13, 2013 ug gipulihan kini sa HB No. 6173 human gipasar sa House Committee on Health ug House Committee on Appropriations.
Matud ni Quisumbing kinsa magpapili sa pagka-mayor sa Dakbayan sa Mandaue nga ang pag-upgrade sa pasilidad makadugang usab kapasidad sa tambalanan ug mas makaserbisyo pa sa mga kabus nga dili makaabot sa bayranan sa mga pribado’ng tambalanan.
Gipahibawo ni Quisumbing nga gipasar na sa House Committee on Health ang iya’ng balaudnon sa una niya’ng termino apan wala kini nakairog sa Senado mao’ng iya’ng gihingusgan ang pagpasar niini isip balaud sulod sa iya’ng termino.
Kung mahimo na nga balaud, malakip na sa programa sa Department of Health ang pundo sa tambalanan ubos sa tinuig nga General Appropriations Act.
Niadto’ng Oktubre 2014, gipasar usab sa Ubos Balay-Balauranan ang HB No. 1543 nga giduso gihapon ni Quisumbing nga mag-usab sa pangan sa Eversley Childs Sanitarium Hospital ngadto na sa Eversley Childs Sanitarium and General Hospital.
Ang balaudnon anaa na sa Senado sukad pa niadto’ng Disyembre 3, 2014. (BANAT NEWS)