CEBU, Philippines - Walay klase sa dakbayan sa Lapu-Lapu karong adlawa samtang mag-half day-work sab ang mga trabahante sa gobiyerno isip kabahin sa pagsaulog sa pista sa Birhen sa Regla sugod karon hangtod sa Sabado.
Ang kamandoan giluwatan ni Mayor Paz Radaza.
Sa laing bahin, matud ni Lapu-Lapu City police chief Armando Radoc nga 468 ka polis ang ipakatap sa lainlaing dapit sa dakbayan aron pagsiguro sa kahusay ug kalinaw.
Moabag usab sa kapolisan ang mga 200 ngadto sa 300 ka force multipliers, sama sa tanod ug civilian volunteers.
Ang pagpa-deploy sa mga force multipliers himoon kay ang request ni Radoc ngadto sa PNP-7 Regional Public Safety Batallion wala maaprobahi kay ang ubang polis gipang-deploy ngadto sa Manila alang sa APEC forum.
Si Frank Brazil, hepe sa City Traffic Management Services sa Lapu-Lapu miingon nga 50 ka traffic enforcers ang gi-deploy karon ug gipatrabaho og 10 ka oras matag shift.
Adunay mga karsada nga gipangsirad-an ug ang mga drayber giawhag nga mosunod ra sa mga traffic signage nga gipahiluna nila sa lainlaing dapit.
Si Radoc miingon nga adunay mga lugar nga gitagana alang sa mga vendors aron dili makadisturbo sa mga mosimba. (BANAT NEWS)