CEBU, Philippines - Hingpit nang gideklarar kagahapon sa hapon sa mga opisyal sa Barangay Mambaling ning Dakbayan sa Sugbo ang sitio Abaya ug Puntod ubos sa state of calamity human dul-an sa singkwenta ka panimalay ang naugdaw sa sunog ug nagkinahanglan og tabang.
Matud pa ni Barangay Kapitan Wilfredo Go, ila pa usab susihon kung pila ang kantidad nga ilang magamit kay atol sa ilang tigum wala man ang ilang tresurera ug magbilin pa usab sila sa ilang calamity fund kay wala pa matapos ang tuig.
Sumala pa ni Go, bugas ug mga delata ang ilang ihatag ngadto sa mga nasunogan ug nanawagan sila karon sa katawhan nga nanginahanglan gayud ang mga nasunugan og dinialian nga tabang sama sa habol, banig,senina ug uban pa nga diin mahimo ra nga mahatud sa Mambaling Barangay Hall nga naa nahimutang sa Ma. Gochan St. Nihangyo usab si Go sa Mambaling Police Station nga butangan og polis sa Alaska Elementary School nga maoy gihimong evacuation center abag sa ilang mga barangay tanod nga binuntagay og bantay sa lugar.
Base sa opisyal nga listahan sa Department of Social Welfare and Services 52 ka panimalay ang apektado sa sunog, diin 49 ang hingpit nga naugdaw, tulo ang partially damaged. Mokabat 140 ka pamilya ang apektado o 571 ka tawo.
Gibutyag ni Portia Basmayor sa DSWD nga moduso pa siya sa iyang kinatibuk-an nga report aron masugdan na unya nila ang paghatag sa mga hinabang ngadto sa mga nasunogan. Ang kabomberohan padayon pang naghimo og imbestigasyon sa maong sunog. (BANAT NEWS)