Ang kalabera iya g’yud sa polis
CEBU, Philippines – Nakunpirmar g’yud nga iya ni PO1 Jimmy Jorge kadtong kalabera nga nakaplagan sa bukirang bahin sa Barangay Santicon, lungsod sa Badian kaniadtong Oktubre 11.
Si Cebu Police Provincial director Noel Gillamac miingon nga positibo gyud nga namatud-an sa dental examination nga ang kalabera iya g’yud ni PO1 Jorge.
Ang mga ngipon sa kalabera gitandi sa dental records ni PO1 Jorge ug ang resulta nagpakita nga susama gayud ang porma sa maong mga ngipon.
Matud ni Gillamac nga kumbinsido siya sa resulta sa eksaminasyon ug karon ang ilang sunod lakang sa imbestigasyon kun gipatay ba g’yud ang maong polis.
Pagka karon nagtuo gyud ang Special Investigation Task Group Jorge nga adunay foul play ang kamatayon sa maong polis apan wala pa sila masayod kun unsa ang motibo sa pagpatay.
Matud ni Gillamac nga gipangita pa usab nila ang amahan ug anak nga nakakita sa kalabera aron makuhaan og dugang testimoniya. Nakadawat sila’g report nga ang amahan ug anak mibalhin na og puyo. Sa wala pa ma-missing si PO1 Jorge, ang iyang mga kauban nakabantay sa kausaban sa iyang panglihok ug may nagduda nga kini miapil og usa ka kulto kay nagpataas na kini og buhok. Posible usab nga si PO1 Jorge miduaw sa maong lugar sa Badian kay gikataho nga daghang mga miyembro sa Kulto nga Dios Amahan ang maong barangay. – /RUB) (BANAT NEWS)
- Latest
