CEBU, Philippines – Wala nahimutang ang usa ka security guard human giilog sa usa ka hubog nga lalaki ang iyahang service firearm sa gawas sa usa ka convenience store sa Pueblo Verde- Tamiya, Brgy. Basak dakbayan sa Lapu-Lapu sa miaging Domingo sa hapon.
Matud ni SPO1 Candido Barinque sa Basak Police Station 4, ang giilogan og armas mao si Roberto Ducoy, Jr. samtang kini mipakalma sa usa ka Luther Molina, 21, production worker ug residente sa San Carlos Village, Barangay Marigondon.
Base sa imbestigasyon, gikatahong nasuko si Molina nga gibadlong ni Ducoy tungod sa kahubog niini. Matud pa kauban ni Molina ang mga higala nga sila si Joel Rivera, 30 anyos, usa ka PUJ driver ug si Roldan Arnelia, 26 anyos, usa ka construction worker nga pulos usab nakainom.
Matud pa gikuptan nila ni Rivera ug Arnelia ang duha ka braso ni Ducoy, samtang gihimong punching bag ni Molina ang biktima ug pagkahuman gikuha ang armas niini ug gibiyaan.
Daling mipahigayon og hot pursuit operation ang kapolisan ug nasakpan ang tulo didto sa Brgy.Gabi sa lungsod sa Cordova.
Nagkanayon si Barinque nga duna silay nakuhang .357 revolver gikan sa tulo, apan gisusi pa kun mao ba kini ang service firearm ni Ducoy. Ang mga suspetsado nangatanggong sa detention cell sa Basak Police Station 4 ug mag-atubang og kaso sa robbery, physical injuries and drunkenness. – /EIM) (BANAT NEWS)