CEBU, Philippines – Molarga paingon sa Roma ang bag-ong auxiliary bishop sa Sugbo, Obispo Oscar Florencio, alang sa tulo ka semana nga seminar.
Pormal nga gidawat si Florencio sa Sugbo pinaagi sa usa ka Santos nga Misa sa Cebu Metropolitan Cathedral nga gidumala ni Arsobispo Jose Palma kagahapon sa buntag.
Si Palma nipahibawo nga gikan sa Roma, si Florencio idestino sa Sto. Rosario Parish sa dakbayan sa Sugbo nga mao’y iya’ng parokya.
Matud ni Palma sa iya’ng wali nga ang pag-abot ni Florencio usa ka gasa sa Ginoo ilabi na sa panginahanglanong pastoral sa Archdiocese of Cebu diin "no return, no exchange" hangtud ang Santo Papa mohatag kaniya og bag-ong assignment.
Samtang si Archbishop Emeritus Ricardo Cardinal Vidal lakip sa niabi-abi kang Florencio ug malaumon nga sama niya, magdugay kini pagpuyo sa Sugbo.
Si Florencio sa iya’ng bahin niingon nga iya’ng paningkamutan nga maayunan sa mga Sugbuanon ang iya’ng mga pamaagi ilabi na nga siya usa ka Waray. – /GMR) (BANAT NEWS)