CEBU, Philippines – Gihangop sa officer-in-charge sa Cebu City Police Office ang plano sa konseho sa dakbayan sa Sugbo nga tagaan og abogado ang mga polis nga mag-atubang og kaso may kalabutan sa ila’ng trabaho.
Matud ni Senior Supt. Marciano Batiancela nga kung madayun ang plano, daku kaayo kini og tabang sa kapolisan ilabi na kadto’ng gipasakaan og kaso sa mga nakontra sa mga polis o nabanggaan sa ila’ng trabaho.
Sumala pa ni Batiancela nga dili kalikayan nga dunay daghang masuko sa mga operasyon sa kapolisan nga mosangpot sa pagpasaka og kaso batok sa mga polis.
Kung duna na’y libreng abogado ang mga polis, ang opisyal niingon nga dili na unya maproblema ang iya’ng mga sakop nga mangita pa og kaduolan sa paglaban sa kaso.
Ang mao’ng lakang gihulagway sa opisyal nga usa ka paagi nga makahatag pa og pagpasaka sa moral sa kapolisan.
Una na’ng niduso og resolusyon si Konsehal Nestor Archival nga nag-awhag sa mayor sa dakbayan sa Sugbo nga tagaan og abogado kadto’ng mga polis nga mag-atubang og kaso gumikan sa ila’ng trabaho. – /GMR) (BANAT NEWS)