CEBU, Philippines - Lalaking gipasanginlang gunrunner nga nag-supply og armas didto sa Mindanao nadakpan sa Duterte Street, Brgy. Suba, Danao City kagahapon sa buntag sa mga sakop sa Criminal Investigation and Detection Group-7.
Si Ricky Laurente, nakuhaan gikan sa iyang panimalay og mga nagkalainlaing klase sa armas pinasikad sa search warrant nga gi-issue ni Regional Trial Court Judge Soliver Peras.
Ang CIDG-7 ug Danao City Police maoy nag-ayon sa pagpaniid kang Laurente sud sa duha ka buwan.
Nakuha sa kapulisan ang walo ka kalibre .45 nga pistola, lima ka ka kalibre .38 nga revolver diin ang usa niini wala pa mahuman, lima ka kalibre 22 magnum (Black Widow).
Nasakmit usab ang 33 ka bala ug pito ka mga magazine para sa kalibre .45 ug 11 ka bala sa.9mm.
Ang chief investigator sa CIDG-7 nga si Senior Inspector Delfin Bontuyan nagkanayon nga dugay na sa maong negosyo si Laurente ug kasagaran sa tigpalit kaniya gikan sa Mindanao.
“Ibaligya niya mga 10 ka buok ngadto sa 15. Naa ra kuno’y moanhi nganhi nga maoy mokuha sa mga armas,” sigon ni Bontuyan.
Ang presyo sa mga armas naggikan og P12,000 ngadto sa P14,000 matag usa. (BANAT NEWS)