CEBU, Philippines - Magtukod og 170 ka balay ang Archdiocese of Cebu kauban ang Caritas Internationalis alang sa mga biktima sa bagyo’ng Yolanda sa amihanang bahin sa probinsiya sa Sugbo.
Matud pa ni Fr. Charles Louise Jayme, ang gitahasan ni Archbishop Jose Palma alang sa rehabilitation program sa mga biktima sa Yolanda, nga naa na sila karon sa ikaduha’ng tuig sa ila’ng programa ug karong buwana sugdan nila ang pagtukod sa mga balay.
Sumala pa ni Jayme nga matag usa ka balay magkantidad og P95 mil.
Dugang ni Jayme nga gawas sa mga balay, aduna usab sila’y mga livelihood projects nga ihatag ngadto sa mga pamilya nga kwalipikado.
Sa nilabay nga tuig nakahatag sila og 270 ka balay ug usa ka libo ka livelihood programs sama sa livestock, small enterprise ug uban pa.
Gibutyag ni Jayme nga dunay mga pamilya ang hingpit na’ng nakabalik sa ila’ng kahimtang ug dunay uban ang mobalik pa lang sa hingpit sa ila’ng kahimtang. (BANAT NEWS)