CEBU, Philippines - Onse ka mga tinun-an sa Hipodromo Elementary School ang nalanag sa wala pa matino nga pagkaon apan gidudahan nilang “masi” ug “puto” ang nakaingon niini tungod kay sagad kanila maoy nakaon kagahapong adlawa.
Ang maong pagkaon gikatahong ilang napalit sa mga bata sulod sa canteen ug sa gawas sa eskuylahan.
Unom sa mga tinun-an mga babaye ug lima ang lalaki nga nagpangidaron og 5- anyos ngadto sa 14-anyos ug gidala sa Cebu City Medical Center.
Matud pa ni Johnrey Sab, uyoan sa tinun-an sa grade six giapas siya sa classmate sa iyang pag-umangkon kay gasuka-suka kini.
Si Celedonio Potot, amahan sa usa sa mga tinun-an nibutyag sa Banat News nga buntag pa nakakaon og masi iyang anak apan nianang pagkahapon nagmulo kini sa kasakit sa tiyan ug nagsukasuka hinungdan nga gidala niya tambalanan.
Nagpasalamat hinuon siya nga nitabang ang eskuylahan.
Ang prinsipal sa maong eskuylahan nga si Romeo Lisondra, nitug-an sa Banat News nga ilang abagahon ang gastuhon alang sa pagpatambal sa mga bata. Si Lisondra miingon nga kinompra gikan sa Carbon Public Market ang maong mga pagkaon.
Tungod niini, ipahunong una niya ang pagbaligya sa maong pagkaon ug ipasusi pagbalik ang pagkaon sa canteen nga gidumala sa mga magtutudlo isip consignee.
Si Dr. Coleen Intong, Senior Resident on Duty sa Pedia Ward sa Cebu City Medical Center nibutyag sa Banat News kinahanglan nilang makakuha og sample sa mga pagkaon aron ipatan-aw sa Food and Drugs Administration, sa City Health Department ug sa Department of Health. (BANAT NEWS)