Gidunggab 47 ka higayon

CEBU, Philippines - Brutal nga kamatayon ang gidangatan sa usa ka lalaki human kini gisansan og dunggab sa iyang kainom diha sa Brgy. Anajao sa bukirang bahin sa lungsod sa Argao sa nakalabay nga hapon.

Ang biktima giila nga si Jeffrey Tanodtanod, 34, nagpuyo sa maong dapit, samtang ang suspetsado naila nga si Reymond Carillo, 22, lumad nga taga Brgy. Bae sa lungsod sa Sibonga.

Ang hepe sa Argao Police Station, Senior Inspector Alejandro Batobalonos nga nahinabi sa Banat News miingon, nakaangkon og  22 ka samad dinunggaban sa atubangan sa iyang lawas ug 25 sab ka samad dinunggaban sa likod nga bahin si Tanodtanod nga maoy nakaingon sa iyang daling kamatayon.

Sa imbestigasyon sa kapulisan nasayran nga sayo pa sa hapon nag-inom ang duha  kauban ang laing usa nila ka higala apan human nakahurot og duha ka lapad  kalit lang gidunggab sa suspek ang biktima.

Ang kauban nila nag-inom nga bakol naatol nga nangasilyas niadtong tungora apan nakadungog sa singgit sa biktima nga nangayo og tabang.

Daling mibalik ang maong bakol apan iyang naabtan ang suspek nga nagyaka sa lawas sa biktima nga gisigehan pa gihapon niini og hansak sa gikuptang kutsilyo, kay wa man siyay ikasukol tungod sa iyang sitwasyon nangayo na lang og tabang ang bakol sa mga silingan, apan sa ilang pag-abot wa na diha ang suspek.

“Mga amigo kaayo ni sila, magkuyog pa man daw gani ni sila mamaligya sa ilang abot sa umahan, wala pud daw naglalis ni sila,” matud pa ni Batobalonos.

Nagduda sab si Batobalonos nga posibling nangita lang og saktong tayming ang suspetsado aron mapatay ang biktima.

Kaso’ng murder ang ipasaka sa kapulisan sa suspetsado nga padayon pa’ng gipangita sa kapulisan. (Jojo C. Ugdol/EIM)(BANAT NEWS)