CEBU, Philippines - Gihagit ni Cordova Mayor Adelino Sitoy kadto’ng mga mananagat nga nihimo og lihok protesta sa buhatan sa Provincial Environment and Natural Resources Office (PENRO) sa Pier 3 dakbayan sa Sugbo nga motungtong sa gitumbok nga reclamation project sa barangay Gabi nga ilang gireklamo.
Matud ni Sitoy nga wala’y taga Cordova nga niapil sa maong rally dungan sa pagkwestiyon ngano’ng adto mag-rally sa laing lugar ug dili sa Cordova kun sila mga molupyo gyud sa lungsod.
Sigun ni Sitoy nga wala siya nasayud kung unsa nga reclamation project ang gireklamo sa mga mananagat sanglit wala’y reclamation nga gihimo karon ug ang ilang gihimo mao ang coastal road.
“Wala ko kasabot, wala may reclamation nga gihimo karon, naa’y gihimo nga mga coastal road, ambot og mao na ilang gipasabot, naglibog ko,” matud ni Sitoy. Wala gisalikway ni Sitoy ang posible’ng politika ang nagpaluyo ilabi na ang iyang manghud nga si Dr. Celedonio Sitoy modagan sa pagka-kongresista sa siyudad sa Lapu-Lapu. (BANAT NEWS)