CEBU, Philippines - Patay ang usa ka asawa nga padulong unta magsugat sa iyang bana human nabangga ang motorsiklo nga iyang gimaneho ug naangol ang anak babaye sa sitio Visayan, barangay Lanas, dakbayan sa Naga kagahapon sa buntag.
Ang namatay naila nga si Evangeline Taboada, 39, taga Dumlog, Toledo City samtang ang angol mao ang 8-anyos nga si April Jane.
Ang drayber sa truck nga gikabangga mao si John Mark Alcanzado, 24, taga Cogon, Naga City.
Si PO3 Kit Nuñez, desk officer sa Naga City Police Station, niingon nga ang inahan ug anak gikan sa dakbayan sa Toledo padulong sa dakbayan sa Naga aron unta pagtagbo sa bana.
Gikan sa Naga ang truck nga gikasugat ni Taboada diha’ng siya ni-overtake sa duha ka sakyanan ug nikawat sa pikas nga lane hinungdan nga nabangga sa truck ang motor.
Ang inahan gidala sa Minglanilla District Hospital apan gideklarar nga dead on arrival samtang ang anak gidala sa South General Hospital.
Ang drayber gikustodiya sa kapolisan sa Naga samtang giandam pa ang kaso nga ipasaka batok kaniya. (BANAT NEWS)