CEBU, Philippines - Gitulis sa duha ka wala mailhing mga lalaki ang usa ka lalaki nga sakay sa iyang Honda CRV sa Barangay Zapatera, Cebu City sa miaging Miyerkules sa gabii.
Ang biktima giila nga si Richleigh Masong Consulta, 26, taga Talamban, Cebu City.
Base sa imbestigasyon sa kapolisan gibanggaan una og multicab ang sakyanan sa biktima sa usa ka lalaki hinungdan nga migawas siya aron sa pagsusi niini. Apan kalit nga dunay usa ka lalaking nagmotor ang mihunong ug mition kaniya og armas ug mideklarar nga tulis. Ang lalaking nagmaneho sa multicab daling misud sa iyang sakyanan ug gikuha ang iyang pitaka.
Matud pa nga duna kini sulod nga kapin sa P100 mil ug nagdali pag-ikyas human sa hitabo.
Gisusi na karon sa Theft and Robbery Section kun dunay closed circuit television camera nga nakakuha og footage sa maong hitabo aron makatabang sa imbestigasyon. (Julie Ann Dominguez ug Donahmae Gadugdug, NSU Intern/EIM)(BANAT NEWS)