CEBU, Philippines – Nagpabilin pa’ng blangko ang kapolisan sa pag-ila sa mga gituohang sakop sa Acetylene Gang nga nilungkab sa M.S.C. Pawnshop sa barangay Basak, dakbayan sa Mandaue.
Si Senior Inspector Genilo Veraque, hepe sa Presinto 3 sa Mandaue City Police Office (MCPO), ang giabagan karon sa mga sakop sa Investigation Detection and Management Bureau (IDMB). Si Senior Police Officer 1 Gregorio Cabisarez niingon nga wala gyud sila makakuha og video footage sa close circuit television (CCTV) camera tungod kay napawong kini dihang gihimo ang pagpanglungkab.
Si Cabisarez niingon nga ang steel cabinet sa pawnshop nga gibutangan sa mga alahas balor og usa ka milyon ka pesos ug salapi nga P100 mil ang gigamitan sa mga kawatan og acetylene. Si Senior Police Officer 4 Marcos Noval Jr. sa IDMB sa kapolisan sa dakbayan niingon nga nagpadayun pa karon ang ilang pagpanghipos og mga kasayuran sa pagsuta kun daku ba nga grupo ang mga kawatan. – /GMR) (BANAT NEWS)