CEBU, Philippines - Nalandig sa tambalanan ang usa ka account officer sa usa ka bangko sa lungsod sa Minglanilla human kini gipusil sa paa sa duha ka mga tulisan sa dihang kini misukol human gitulis sa Poblacion Ward 2 sa maong lungsod.
Ang biktima naila nga si Eudel Mar Acabal, 23, taga barangay Candulawan, Talisay ug nagtrabaho sa Life Bank Foundation Incorporated nga nahimutang ra sa maong lungsod.
Matud pa ni Police Officer 2 Nikki Carlo Plarisan ang desk officer sa Minglanilla Police nga nahinabi sa Banat News nga nagbarog ang biktima sa lugar dihang gihunongan sa usa ka motorsiklo sakay ang duha ka lalaki ug mideklarar og tulis dayon pangayo sa iyang bag.
Ang back rider mition og armas sa biktima ug pugsanon nga mikuha sa dala niya nga bag nga gisudlan og P15 mil nga koleksyon, passbooks ug uban pa nga mga importanteng papeles.
Wala pa matagbaw ang tulisan gikuot pa ang bulsa sa biktima ug dinhi na mikisikisi si Acabal, apan sa kalagot sa tulisan gipusil niini ang paa sa biktima ug dayon sibat palayo.
Ang biktima daling gidala sa tambalanan samtang padayon pa ang imbestigasyon sa kapolisan. (BANAT NEWS)