CEBU, Philippines – Ang mga trabahante sa Department of Public Works and Highways-7 gipaubos sa seminar ug training sa Cebu City Traffic Operations Management sugod kagahapon.
Matud ni Jonathan Tumulak, operations chief sa CITOM, si DPWH regional director Ador Canlas mihangyo sa maong seminar aron ma-deputize ang 60 ka mga sakop sa DPWH aron makatabang sa mga traffic enforcers sa siyudad.
Sigon pa ni Tumulak nga gihimo kini ni Canlas human giputol na ang pag-deputize sa Land Transportation Office ngadto sa DPWH.
“So, nakahibaw man pud ang DPWH nga naa tay existing city ordinances sa traffic laws sa siyudad, nisulod sila sa CITOM para makatabang kay kanang mga obstruction sa dalan, ang illegal parking kay apil pud na sa ilang concern and mandate,” matud ni Tumulak.
Ang mga DPWH personnel makahimo na unya sa pagpanakop sa mga badlungong drayber apan dili sila tugotang makahimo og sketch kun dunay mahitabong bangga. Ang 50-60 ka trabahante sa DPWH mag-man sa traffic sa busy nga intersections sa siyudad sa Sugbo karong Biyernes isip ilang on the job training.
Sigon ni Tumulak nga dako na kaayo kini’g tabang sa CITOM tungod kuwang ra ang 230 ka traffic enforcers sa siyudad.
Hinuon, dili makagasto ang siyudad sa sweldo sa deputation sa DPWH personnel. – /EIM) (BANAT NEWS)