CEBU, Philippines - Tabangan sa kagamhanan sa dakbayan sa Lapu-Lapu ang pamilya sa mga mananagat nga ni-eskapo sa ilang amo sa Palawan.
Si Mayor Paz Radaza nimando sa City Welfare Services sa pag-asses sa mga gikinahanglan sa matag pamilya sa 23 ka mananagat kinsa biktima sa human trafficking.
Si Radaza niingon nga tabangan ang mga biktima ug makig-estorya sa mga kompanya sa matag barangay nga tagaan sila’g trabaho nga makapadayun sila sa ilang panginabuhi. Sa 26 ka mananagat nga na-rescue, 23 niini lumad nga taga Lapu-Lapu, duha gikan sa Cordova ug usa taga lungsod sa Tuburan.
Matud ni Radaza nga sagad sa na-rescue gikan sa isla sa Santa Rosa, Sabang, Tinggo, Talima, Baring ug Tungasan.
Matud ni Radaza nga usa sa matag pamilya ang mamahimong pasudlon og trabaho.
Ang mga mananagat girekrut sa niaging Oktobre diin gitagaan sila og P7,000 nga advance payment ug P8,000 niadto’ng Nobiyembre dayun larga padulong sa isla sa Balabac sa Palawan.
Giingong gipatrabaho ang mga biktima bisan bati ang panahon, may gikulata ug kuwang ang ilang kaon sulod sa duha ka buwan.
Nakaikyas ang mga biktima pinaagi sa paggisi sa pukot aron makaadto sa daplin sa dagat ug nidangop sila sa usa ka pari. Ang kapitan sa barko nailhan nga usa ka Boy nga nadakpan na samtang gipangita pa ang tag-iya nga si Ramir Noval nga taga Marigondon, dakbayan sa Lapu-Lapu. (BANAT NEWS)