CEBU, Philippines - Dakung buhi ang motorista nga gikataho nga namatay human nalamba ang motorsiklo nga iyang giluwanan sa sementadong karsada sa barangay Polambato, dakbayan sa Bogo niadtong Enero 11 sa gabii.
Gibase ang nahaunang taho nga namantala sa blotter sa kapolisan sa dakbayan sa Bogo.
Si Senior Police Officer 3 Oswaldo Layson sa Bogo City Police Station miila sa biktima nga naangol nga si Jay John Olivar, 24-anyos, ulitawo nga taga barangay Argawanon, lungsod sa San Remigio.
Matud ni Layson nga kusog nga nagdagan ang motorsiklo sa biktima gikan sa Polambato Wharf ug paghidangat sa national road sa mao gihapon nga dapit kalit lang nabangga sa gutter hinungdan sa pagkalamba.
Gumikan sa kusog nga impact sa pagkalamba sa motorsiklo, ang biktima nalabay ngadto sa sementado nga bahin sa karsada hinungdan sa grabe’ng kadaut nga naangkon sa iyang kalawasan.
Dali nga gihatud ang biktima sa Bogo Provincial Hospital ug luwas na sa kuyaw nga kahimtang. (Romeo T. Limpangog/GMR)(BANAT NEWS)