CEBU, Philippines – Gitinguha nga ang mga senior citizens nga mga piniriso sa Cebu Provincial Detention and Rehabilitation Center (CPDRC) ibuwag na og brigada karon’g tuiga.
Ang warden sa CPDRC, Romeo Manansala, nagkanayun nga karong tuiga gikatakda’ng magpatukod sila og extension nga brigada alang sa mga tiguwang na nga piniriso.
Ang brigada nga tukuron moigo og 50 ka piniriso.
Sa pagkakaron ang CPDRC aduna’y 40 ka inmates nga mga senior citizens kinsa may mga kaso sa murder, ginadiling drugas ug rape diin ang kasagaran nga biktima mga menor de edad.
Matud ni Manansala nga ang CPDRC aduna’y kapin sa 2,000 ka inmates ug kapin sa 90 niini mga babaye.
Gibutyag ni Manansala nga 70 porsiyento sa mga inmates ang kaso mao ang pagkalambigit sa ginadiling drugas.
Ang CPDRC maka-accommodate lang unta og 1,400 ngadto sa 1,600 ka inmates.
Ang prisohan gilangkuban sa 120 ka dorms nga puy-anan sa mga priso ug ang gamay nga dorm 14 ka inmates lang ang kapasidad niini ug 22 ang kapasidad sa daku nga dorm.
Apan karon ang matag dorm kapin sa 30 ka inmates ang nag-okupar niini.
Samtang nanghinaut usab si Manansala nga gahinan sa Kapitolyo og dugang pundo aron sila maka-hire og dugang 15 ka jail guards.
Nagtinguha usab sila nga makabaton og K-9 units. (BANAT NEWS)