CEBU, Philippines - Way klase sa tanang levels ang mga pangpublikong eskuylahan sa tibuok lalawigan sa Sugbo ug ingon man ang Metro Cebu karong adlawa.
Kini aron mahatagan og kahigayonan sa pagpanglimpyo ang nagkadaiyang mga tunghaan nga gihimong evacuation centers.
Ang mga lokal nga kagamhanan manglimpyo usab sa gibiling mga kadaot ug basura sa bagyong Ruby kagahapon. Si Gobernador Hilario Davide III mideklara nga wala’y klase karong adlawa (Lunes) apil na niini ang mga public colleges ug pribadong mga eskuylahan sa probinsiya sa Sugbo. Samtang sa dakbayan sa Sugbo, si Mayor Michael Rama mideklarar nga way klase karong adlawa. Karong adlawa magsugod ang siyudad sa ilang clearing operations sa kadalanan.
Susama usab ang kamandoan nga gipagawas ni Mandaue City Mayor Jonas Cortes human nga daghan sa iyang mga konstituwente sa gikan sa 25 ka barangay ang namakwit sa nagkadaiyang evacuation centers sa siyudad.
Samtang si Mayor Paz Radaza sa dakbayan sa Lapu-Lapu mideklarar usab nga way klase sa tanang eskuylahan sa siyudad lakip na ang sa Caubian island ug Olango island. (BANAT NEWS)