CEBU, Philippines - Pamilya sa nabanggaan sa kanhi hepe sa Bantay Dagat sa Kapitolyo nga si Loy Madrigal mibahad nga mopasaka og kaso kung dili kini moatubang kanila ug mohatag og tabang tungod kay naglisod sila karon sa ilang panginabuhian.
Kagahapon sa buntag, ang nabiyuda nga si Marites Mirambel, 43, kinsa nabalian sa iyang walang bitiis uban sa iyang kamaguwangang anak nga si Leslie Niña, 19, midangop sa buhatan ni Gobernador Hilario Davide III. Matud ni Marites nga gusto siyang mangayo og tabang ni Madrigal tungod kay naglisod na kini pagbuhi sa lima ka anak.
Si Marites nagtrabaho isip housekeeping ug ang iyang namatay nga bana nga si Felix, usa ka company driver sa usa ka hotel sa lungsod sa Medellin nagdawatan unta og kinatibuk-ang sweldo nga P16,500, apan sa pagkakaron, wala na ug nagsalig sila sa pagkaon gikan sa mga paryente.
Ang kagamhanan sa Kapitolyo maoy miabaga sa tambalanan ug sa pagpalubong sa bana ni Marites.
Kagahapon si Davide mitunol kang Marites og P3,000 gikan sa iyang kaugalingong bulsa ug gitanyagan og trabaho diha sa Kapitolyo ang anak niini.
Samtang i- reimburse usab ang kapin P30 mil nga gastos sa pamilyang Mirambel sa tambalanan. (Brenda D. Batuto/EIM)(BANAT NEWS)