CEBU, Philippines - Duha na ka bata sa Barangay Buhisan, dakbayan sa Sugbo ang giingong gipatay sa usa ka “ungo” ug naalarma na karon ang mga lumolupyo sa mao’ng dapit ug dili na mokompiyansa pagbiya sa ilang mga anak panahon sa gabii.
Ang katapusang gipaak sa ungo nga matud pa nagpakairing-iring diha nga misulod sa balay mao ang duha pa lang ka semana nga masuso nga anak sa magtiayon nga Aquilles ug Lorna Sabidor, nagpuyo sa Sitio Puso, Barangay Buhisan.
Ang apohan sa bata nga si Sylvia Sabidor, 65-anyos, mitug-an sa Banat News nga ang itom nga iring misulod sa gubaon nga balay sa iyang anak nga nangatulog na unta mga alas otso sa gabii kaniadtong Miyerkules.
Nakatulog na unta ang magtiayon uban sa ilang mga anak apan kalit sila nga nahipugwat diha nga mitiyabaw pag-ayo ang masuso nila’ng anak ug nakita nila ang iring nga milusot sa lungag.
Nakita sa magtiayon nga ang bata adunay agi sa pinaakan sa iyang liog nga milagom ug may dugo nga migawas sa iyang ilong. Gidala nila ang bata sa ospital apan namatay g’yud ang bata.
Matud ni Sabidor nga ang lain niya’ng apo nga nagpangidaron og lima pa ka buwan gipaak gihapon sa mao nga iring-itom.
Si Sabidor miingon nga ang lima ka buwan niya’ng apo nga namatay usab pipila ka buwan na ang nakalabay anak nila ni Janice ug Dalmacio nga tua karon sa Manila ug ang bata gibilin lang kaniya.
Gawas sa duha ka apo ni Sabidor, may lain pa nga bata nga anaa pa gani gihaya karon sa kapilya sa Sitio Puso ug ang mga ginikanan miingon nga may nakita usab sila nga pinaakan sa liog sa bata.
Si Buhisan Barangay Kapitan Gremar Barete wala motuo nga ungo ang mipatay sa mga bata apan mohimo sila og pakisusi niini. Bisan gani si Police Inspector Jeciree Saquilabon nga nadestino sa Police Regional Office (PRO)-7 ug taga Sitio Puso, Buhisan miangkon nga gikulbaan na kaayo sila sa report nga may ungo nga nakapatay na og tulo ka bata sa dapit nga ilang gipuy-an. (BANAT NEWS)