CEBU, Philippines – Patay ang 32-anyos nga lalaki human gitabangan og dunggab sa duha ka magsuon sa sitio Sampig, Mantalongon, Dalaguete, niadtong nakalabay nga hapon.
Ang mga suspek naila nga sila si Joselito Cataytay ug manghud nga si Felix, pulos hingkod nga nagpuyo sa maong lugar samtang ang biktima naila nga si Ricardo Cartesiano, minyo, silingan sa mga suspek.
Matud ni SPO3 Cleto Pia nga sa wala pa nahitabo ang krimen, nagkalalis pipila ka adlaw na ang nakalabay si Cartesiano ug Joselito sa wala pa matino nga hinungdan.
Sakay sa motorsiklo ang biktima nga gikan pa sa ilang panimalay ug giingong giatangan ni Joselito.
Sa paghunong sa biktima kalit lang gidunggab ni Joselito ug nitabang si Felix.
Daling gidala sa Cardinal Rosales Memorial Hospital ang biktima apan nakabsan gyud sa iyang kinabuhi samtang nisibat ang suspek. – /GMR) (BANAT NEWS)