Namaligya’g suwertres masiao nadakpan

CEBU, Philippines - Nasakmit sa mga sakop sa Criminal Investigation and Detection Group (CIDG-7) ug kapolisan sa Liloan ang mga nagkalain-laing paraphernalia sa masiao nga suwertres gikan sa lalaki sa sitio Landing, Catarman alas 7 pasado ang takna sa miaging gabii.

Si PO3 Jesson Gayo sa Liloan Police Station miila sa dinakpan nga si Perter Tajar, 42-anyos, taga sitio Magay, Catarman.

Matud ni Gayo nga usa ka sakop sa CIDG-7 ang nagpakaaron-ingnon nga mopalit og numero sa suwertres nga 777 nga nagkantidad og P497.

Gidawat sa suspek ang maong kantidad bugti sa giisyu nga numero hinungdan sa pagkasikop.

Dihang girikisa, maoy nakuha sa kapolisan ang tulo ka tally sheets nga may mga kombinasyon sa numero lakip na mga stubs ug salapi nga P2,500 nga gituohang halin. (BANAT NEWS)