CEBU, Philippines – Ipaubos sa Character Aptitude and Development Enhancement Training (CADET) ang kapolisan sa dakbayan sa Sugbo human malambigit ang pipila ka sakop sa Cebu City Police Office sa mga kontrobersiya sa nakalabay nga mga adlaw.
Mao kini gibutyag sa hepe sa Police Community Relations Branch sa CCPO Chief Inspector Enrique Belciña atol sa pakighinabi sa programa nga Ratsada 648 sa dyRC kagahapon sa buntag. Sumala pa ni Belciña nga niadtong Biyernes sa buntag mipatawag og emergency conference ang city police director nga si Senior Superintendent Noli Romana ug usa sa nahisgotan nila ang pagpahigayon og CADET program.
Ang maong programa nagtumong sa pagbalik tan-aw sa mga sakop sa kapolisan sa mga moral values o maayong pamatasan nga gitudlo kanila sa ilang ginikanan sa ilang tagsa-tagsa ka panimalay.
Tudloan usab sila kun unsaon pagdala ang ilang kinitaan, basic human rights refresher course ug uban pa.
Usa sa yawe niini matud pa ni Belciña, kinahanglang di molapas sa income ang expenses sa panimalay. – /EIM) (BANAT NEWS)