CEBU, Philippines - Ilusad karong Domingo ang Green Loop sa dakbayan sa Sugbo ug lima ka barangay ang maapektohan niini nga mao ang Kamputhaw, Capitol Site, Cogon- Ramos, Santa Cruz ug Zapatera.
Ang Green Loop usa sa gituohang solusyon sa kahuot sa trapiko ug polusyon dinhi sa siyudad.
Sila si Marc Canton, sa Livable Cebu, Architect Socorro Atega, executive director sa Cebu Uniting for Sustainable Water ug Maritoni Corominas, chairwoman sa Federation of Volunteers thru Radio Communication ang mipasiugda sa Green Loop. Giklaro sa grupo nga walay siradohong karsada karong Domingo apan bahinon ang karsada alang sa mga motorista, pedestrians, bike lanes ug sa sidewalk.
Ang tuo nga lane gikan sa Mango Avenue paingon sa Echavez gigahin kini alang sa motorized vehicles ug sa pikas habig sa karsada gigahin kini alang sa pedestrians.
Matud ni Canton nga mag-obserba sila sa komento sa motorista ug pedestrians sa mao nilang eksperimento aron basehan sa laing eksperimento hangtud nga maperpekto nila ang proyekto.
Ang maong “road sharing activity” ipahigayon gikan sa alas 3:00 sa hapon hangtud sa alas 7:00 sa gabii.
Matud sa grupo nga gawas pa niini, dunay 16 ka mga kalingawan nga ipahigayon sama sa Zumba, flow arts, yoga, poso making ug skate boarding. Dunay mga sakop sa City Traffic Operation Management (CITOM), kapolisan ug mga tanod nga ipakatap sa mga maapektohang lugar. (BANAT NEWS)