CEBU, Philippines - Gimando ang pagparehistro sa buhatan sa City Agriculture sa Mandaue ang tanang commercial fishing vessels ug mga fishing boats nga mao’y basehan sa pagtugot nga makapanagat ug makadunggo sa mga pantalan sa dakbayan.
Kini pinasubay sa ordinansa nga gipangamahan ni Konsehal Jimmy Lumapas nga gipasar sa konseho.
Ang pagpangrehistro himoon sa buwan sa Enero sa matag tuig.
Ang registration fee mao ang P100 sa hook and line fishing boat, P500 sa motorized fishing boat, ug P5,000 sa commercial fishing vessels.
Ang buhatan sa tresurero sa dakbayan mao ang mokolekta sa maong kantidad sa matag tuig isip registration fee ug pagahimoon kini sulod sa 20 ka adlaw nga nakalabay sa bulan sa Enero.
Ang dili makarehistro sa gitakdang petsa multahan og 50 porsiyento sa kantidad nga bayran sa rehistro.
Ubos sa maong ordinansa, kinahanglan usab nga ang mga trabahante sa barko ang magparehistro usab sa Registry of the Fisherfolks sa buhatan sa City Agriculture. (BANAT NEWS)