CEBU, Philippines - Gihatagan og pasidungog ang Regional Public Safety Battalion-7 sa direktor sa Police Regional Office-7, Chief Supt. Prudencio Bañas.
Kini tungod sa ilang accomplishments nga naglakip na sa pag-ibot sa kapin sa 10 mil ka punoan sa marijuana niadtong Agosto.
Si Supt. Clifford Gairanod, battalion commander sa RPSB-7, miingon nga nakita ni Bañas ang ilang kalampusan hinungdan nga gihatagan niya og pasidungog.
Atol sa command visit ni Bañas iyang gihatagan og “Medalya ng Papuri” si Insp. Alvin Enguito, officer-in-charge sa Regional Public Safety Company, nga maoy nangulo sa maong operasyon kauban sa iyang mga tawo.
Matud pa ni Gairanod nga ang medalya ni Enguito nakuha niya tungod sa pagka-ibot sa kapin sa 10 mil ka punoan sa marijuana nga nagkatap sa mga lungsod sa Badian ug Dalaguete.
Aksidente nga nadiskobrehan sa grupo ni Enguito ang plantasyon sa marijuana sa maong mga lungsod tungod sa minor operation nga ilang gihimo sa maong mga dapit. Mikabat sa P880 mil ang balor sa maong marijuana.
Sumala pa ni Gairanod nga bisan pa man ang ilang mandato mao ang kampanya sa anti-insurgency apan misuporta gihapon sila sa kampanya ni Bañas batok sa ilegal nga drugas.
Dugang ni Gairanod nga human sa gamay nga programa, nagpahigayun og command conference si Bañas nga gitambongan sa Directorial Staff ug misuroy sa pasilidad sa Camp Ceferino Genovia sa barangay Bahay, lungsod sa Sibonga. (BANAT NEWS)