CEBU, Philippines – Ang mga sakop sa Traffic Enforcement Agency of Mandaue (TEAM) nga nadistino sa eskina sa Sitio Marfa sa Barangay Bakilid gibalhin pagdestino sa laing lugar tungod sa report nga pipila kanila modawat og kuwarta gikan sa mga drayber. Gipahibalo ni TEAM operations chief Edwin Ermac ang maong kasayuran atol sa tigum nga gitambongan sa mga PUJ driver nga sakop sa Pinagkakaisang Samahan ng mga Tsuper (PISTON) nga nagbiyahe sa nagkadaiyang rota sa Mandaue.
Matud ni Ermac nga nakadawat siya og report nga ang mga PUJ driver maghatagan og P20 ngadto sa P50 sa mga traffic enforcers bugti sa dili pagdakop kanila sa ilang paghimo og ilegal terminal sa maong lugar.
Gitataw ni Ermac nga ang paglahugay lang ang iyang nahimo ngadto sa mga traffic enforcer tungod kay ang taho nga iyang nadawat wala man usab motumbok kinsa ang traffic enforcer.
Tungod sa maong kasayuran nga nadawat ni Ermac giawhag niya ang mga drayber gipangilkilan sa mga traffic enforcer nga mohatag kaniya og mga pangalan aron basehan niya sa pagtangtang sa serbisyo. Matud ni Ermac nga bisan kon walay unloading ug loading area ang mga PUJ nga nagbiyahe sa Mandaue apan ilang gitugot ang paghunong sa mga jeepney sa bisan asa nga karsada sa tuyo nga makapakanaug ug pagpasakay og pasahero.
Si Ermac miingon nga sa pagpakanaug ug pagpasakay og pasahero sa PUJ drayber kinahanglan nga masiguro usab ang gimaneho nga sakyanan nga anaa sa tukmang lugar aron dili mababagan ang nagsunod nga sakyanan. Giklaro ni Ermac nga ang mga drayber nga mohunong sa pagpakanaug o mopasakay og pasahero kinahanglan usab nga molarga dayon kay ang paghunong og dugay kay magpaabot pa nga mapuno sa pasahero ang sakyanan giisip na kini nga gihimo nila ang dapit nga ilegal termimal. (BANAT NEWS)