CEBU, Philippines - Gidakop sa kapolisan ang usa ka polis sa Misamis Oriental kay nahibaw-an nga mao kini ang nagtulis sa manager sa Cebuana Pawnshop didto sa Barangay Luray, lungsod sa Carmen kaniadto’ng gabii sa Agosto 19.
Si PO1 Eugene Polotan Salingay, sakop sa Oroquita City Police Station, nadakpan didto sa dakbayan sa Danao kaniadto’ng Biyernes ug nakuha gikan kaniya ang mga butang sa biktima nga si Jocelyn Garbo.
Nakuha gikan ni Salingay mao ang green nga pitaka, company ID, lisensiya sa Land Transportation Office (LTO), Social Security System (SSS) ID, nga pulos gipanag-iya ni Garbo.
Matud ni SPO2 Simplicio Gibo sa Carmen Police Station nakapalig-on kini sa ebidensya nga si Salingay g’yud ang mitulis sa 42-anyos nga pawnshop manager.
Si Garbo miingon nga nakatimaan g’yud sila sa panagway ni Salingay kay kanunay kini nga magbalik-balik sa pawnshop nga moprenda og mga selpon.
Ang mga polis nga nakadakop ni Salingay mao sila si PO2 Everette Capuyan ug PO1 Ralfh Laurel nga mihimo’g follow-up operation sa pagpanulis.
Sa pakisusi nga ilang gihimo, nasayran nga si Salingay wala na mo-report sa bag-o niya nga assignment didto sa Don Victoriano Police Station nga sakop gihapon sa Misamis Oriental.
Gisusi usab sa kapolisan kon si Salingay wala ba malambigit sa ubang pagpanulis nga nahitabo dinhi sa Sugbo. (BANAT NEWS)