CEBU, Philippines - Patay on the spot ang usa ka drayber sa traysikol human kini gibanhigan sa duha ka tawo diha sa Sitio Iba, Basak, dakbayan sa Lapu-Lapu sa milabay’ng gabii.
Ang biktima mao si Mark Poblador Lara, 25, residente sa maong dapit.
Sa pasiunang imbestigasyon ni PO2 Joseph Cutanda nasayran nga nagmaneho si Poblador sa iyang traysikol sa dihang kalit duha ka tawo nga luwan og motorsiklo dayong pamusil ngadto sa biktima.
Si Poblador nahiagom og samad pinusilan sa iyang liog, dughan, walang kilid ug sa tuhod hinungdan sa iyang hinanaling kamatayon.
Samtang daling misibat ang mga mamumuno human sa maong insidente ug wa na maapsi sa migukod nga kapolisan.
Nakuha diha sa crime scene ang duha ka basiyo sa bala sa kalibre .45 ug laing metal slug sa wala pa mailhing kalibre nga milubong sa lawas ni Poblador.
Nagduda ang kapolisan nga personal nga kalagot ang motibo sa maong pagpamanhig ni Poblador. (BANAT NEWS)