CEBU, Philippines - Kampanya sa City Traffic Office Management (CITOM) batok night parking nakasakop na og 235 ka mga sakyanan sulod lang sa bulan sa Mayo.
Si Joy Tumulak, operations officer sa CITOM miklaro nga bisan kadtong mga sakyanan nga gi-park sa pay parking zones basta pabuntagan, bawal gihapon kini ug mahimo silang pamultahon.
Sa laing bahin walo sa 45 ka draybers nga nalutsan og warrant of arrest sa miaging semana tungod sa traffic violations ang nadakpan na sa CITOM.
Sa walo, usa niini estudyante nga nagkuha og medical course sa usa ka unibersidad ug ang uban pulos mga PUJ drivers.
Si Tumulak miingon nga pagkahuman og bayad sa ilang multa gihatagan sa CITOM og clearances ang maong mga draybers ug gidala sila sa sala ni MTCC Judge Monalila Tecson aron ma-dismiss ang ilang kaso.
Hangtod karun padayon pa ang pagpangita sa mga nahibiling mga drayber nga nalutsan og warrant of arrest. Gigamit usab nila ang social networking sites aron mas mapadali ang pagpangita kanila. (BANAT NEWS)