CEBU, Philippines - Daling natabang sa kaugalingong bombero ug mga trabahante ang usa ka lumber yard sa Barangay Ibabao, dakbayan sa Mandaue kagahapon sa buntag.
Nagsugod na unta pagsilaob ang kisame sa bodega sa Matimco Lumber Inc. alas 11:04 kagahapon sa buntag apan dali kining napawong sa nagtinabangay nga trabahante ug mga bombero.
Si SFO1 Nilo Cosedo miingon nga ang mga trabahante nga gihulmang fire brigade sa kompaniya ang nakapakgang sa kayo sa maong bodega nga maoy gipundohan sa mga imported nga mga lumber.
Igo lang nakaangkon og gamay nga kadaut sa kayo ang atop sa bodega.
Si Cosedo miingon nga dihang ilang gisusi ang atop diin nagsugod ang kayo, ilang nasuta nga ang ilang poste natumba ug ang linya sa kuryente nasaghid sa atop nga sin ug nalanay sa kainit sa panahon hinungdan sa pagmugna og sunog.
Sukad Enero ning tuiga nasinati sa dakbayan ang tulo ka mga sunog.
Naglakip sa mga sunog sa dakbayan karong tuiga nahitabo sa Barangay Banilad, Tingub ug Alang-Alang. (/GMR)(BANAT NEWS)