CEBU, Philippines - Usa ka suspetsado sa pagpamusil kinsa mitago sa imburnal sukad pa niadtong Domingo ang nalandig sa tambalanan human tabangi og kulata sa mga paryente ug silingan sa iyang nabiktima human ang suspetsado migawas sa imburnal nga iyang gitagoan kagahapon sa buntag.
Nakaangkon og mga bun-og sa iyang lawas si Carlo Oyo-a, 31, taga Ward III, lungsod sa Minglanilla human tabangi og kulata sa mga silingan ug paryente sa biktimang si Jhonny Laranio, taga Sitio Libo, Barangay Mohon, dakbayan sa Talisay.
Ang mga paryente sa biktima mibutyag nga ang insidente sa pagpamusil nahitabo niadtong Domingo sa gabii diha sa humayan sa Sitio Libo.
Niadtong higayona ang biktima giingong nanulo og isda sa humayan aron ipasud-an sa iyang asawa nga bag-o pang nanganak dihang giingong naghangos nga miduol ang suspek nangayo og tabang kang Laranio.
Giingong miduol ang biktima sa suspetsado aron tabangan unta kini apan gipusil na hinuon sa suspetsado ang biktima.
Si Laranio patay diha-diha human makaangkon og samad pinusilan sa dughan. Human sa pagpusil giingong mitago kini diha sa imburnal hinungdang giatangan kini sa mga silingan ug paryente sa biktima.
Kagahapon sa buntag migawas si Oyo-a nga nag-brief na lang gikan sa imburnal kay wa na kini makaagwanta sa kagutom ug kauhaw.
Si Oyo-a daling gidala sa mga polis ngadto sa Talisay City District Hospital apan gibalhin kini ngadto sa Vicente Sotto Memorial Medical Center. Si Oyo-an mag-atubang kini og kasong murder. (BANAT NEWS)