CEBU, Philippines - Dul-an 30 ka barung-barong ug uban pa nga estraktura nga nagbabag sa dalan B. Rodriguez Ext., Barangay Sambag II ang gipangguba kagahapon sa kagamhanan sa dakbayan sa Sugbo. Si Raquel Arce, pangulo sa Prevention Restoration Order Beautification and Enhancement (Probe), mipatuman sa demolisyon nga walay bisan usa sa hingtungdan ang mibabag. Matud ni Arce nga walay kagubot nga nahitabo sa pagpangguba nila sa mga barung-barong kay gipahibalo na man sila daan sa katuyoan sa dakbayan.
Gawas sa mga barung-barong, ang PROBE mihawan usab sa karsada ug gipanguha nila ang mga tapangko sa kabalayan nga milapas na sa karsada ug makabalda na sa pag-agi sa mga tawo ug sakyanan.
Si Arce miingon nga tungod kay ang sidewalk nga agianan unta sa mga tawo gigamit na man sa mga tag-iya sa kabalayan daplin sa karsada, ang mga tawo adto na sa karsada molakaw.
Ang mga opisyal sa Barangay Sambag II adunay proyekto nga pagsemento sa karsada apan dili sila makahuygo sa trabaho tungod sa mga illegal structures sa aseras. (BANAT NEWS)