CEBU, Philippines - Mokabat sa 720 mil ka pesos balor sa alahas ug cash ang nakuha gikan sa usa ka ginang human giunay og tulis sa iyang kapuyo ug sa igsoon sa biktima diha sa Pacific Villa, Brgy. Pajac dakbayan sa Lapu-Lapu.
Ang biktima mao si Devina Montebon Briones, 42,residente sa maong dapit. Samtang gitumbok nga mitulis sa ginang mao si Jerome Briones, 18, igsuon ni Devina ug ang kanhi kapuyo ni Devina nga si Rodel Apduhan alyas Lawlaw, 28, residente sa lungsod sa Cordova.
Nakuha gikan sa biktima ang nagkalain-laing alahas ug cash nga P20 mil. Sa gihimong follow up nila ni CInsp. Conrado Manatad ug mga kaubanan sa Police Station 2 una nilang nasikop si Jerome Briones kinsa maoy mitug-an nga lakip si Apduhan ang mitulis sa iyang maguwang.
Nakuha pagbalik sa kapolisan gikan ni Apduhan ang P7 mil cash, usa ka bultong shabu, usa ka kalibre 45 pistola ug mga buhing bala ug magazine.
Atol sa imbestigasyon si Apduhan mitug-an nga si Jerome maoy mihatag kaniya sa yawe sa lawak ni Devina ug sa nahimutangan sa alahas ug magbahin na lang sila sa kita niini.
Matud pa ni Manatad padayon pa ang ilang pagpangita sa laing suspek nga maoy gitugyanan ni Apduhan sa mga alahas nga wala pa makuha og balik. (/EIM)(BANAT NEWS)