CEBU, Philippines - Usa ka lalaki ang nasakmitan og peke nga driver’s license atol sa checkpoint nga gipahigayon sa kapolisan diha sa dalan Sotero Cabahug sa barangay Ibabao Estancia, dakbayan sa Mandaue sa miaging hapon.
Ang gidakop mao si Jeofrey Tugade, 34, nga taga sitio Immaculada, barangay Jagobiao sa maong dakbayan nga gidakop sa kapolisan sa Presinto 1 sa Mandaue City Police Office.
Matud pa ni PO2 Jesson Estrera nga ang ilang hepe nga si Chief Inspector Jimmy Aguisanda maoy nangulo sa checkpoint dihang ilang nabantayan nga peke ang lisensiya ni Tugade.
Dihang gitunol ni Tugade ang iyang lisensiya nabantayan dayon nga peke kini tungod kay lusparon kun itandi sa Land Transportation Office.
Kasong kalapasan sa Republic Act 4136 o ang Land Transportation and Traffic Code tungod sa paghupot ug paggamit og peke nga lisensiya.
Ang dinakpan nagdumili na sa pagtug-an kun diin niini makuha ang fake nga lisensiya gawas pag-ingon nga nagtuo gyud siya nga orihinal ang driver’s license nga iyang gilukat. (BANAT NEWS)