CEBU, Philippines - Namatay ang usa ka Amerikano ug naangol ang tulo ka laing tawo dihang nagkasingki ang duha ka motorsiklo nga ilang gisakyan ug pareho’ng nangaligdas sa national road sa Barangay Tunga, Moalboal.
Ang report nga miabot sa Cebu Provincial Police Office (CPPO) nagkanayon nga ang Amerikano nga si Eric Kemsuzian, 51, gidali pagdala sa Badian District Hospital apan wala na g’yud matabang.
Si Geraldine Tibalado nga angkas sa motor nga gimaneho sa Amerikano nakaangkon usab og mga pangus sa kalawasan.
Naangol usab sila si Soren Monteposo, 43, minyo, ug ang iyang angkas nga si Marvin Lagada, tungod kay maayo sila’ng pagkabagnus sa karsada.
Matud sa kapolisan nga wala dayon sila makakuha og driver’s license gikan sa Amerikano ug kang Montenoso, taga Candabong, Alcantara nga maoy nagmaneho sa laing motor.
Basi sa imbestigasyon sa kapolisan, ang duha ka motorsiklo nagsunod paingon sa Moalboal town proper ug ang mga sakay pareho nga wala magsul-ob og crash helmet.
Matud pa nga si Montenoso misignal og left turn apan wala makabantay ang Amerikano ug mipaturatoy kini pagpadagan agi sa iyang wala mao nga nagkabag-id ang duha ka motor.
Ang mga nakakita miingon nga nalagpot ang Amerikano ug nakuyapan samtang ang ubang biktima nangligdas usab sa karsada ug parehong nakaangkon og daghang pangus ug bun-og sa kalawasan.
Si PO1 Jennis Lamosao sa Moalboal Police Station miingon nga giimbistigar pa nila kun kinsa g’yud ang sad-an sa mao nga hitabo. (BANAT NEWS)