CEBU, Philippines - Pormal nang miasumer ang bag-ong Enforcement and Security Services (ESS) Customs Police District Commander Capt. Jerry Manuel Arizabal kagahapon sa hapon.
Base sa EG# 2014-01 nga giluwatan ni ESS Director (ret.) Gen. Willie Tolentino si Maj. Camilo Casculan Jr. adto na idestino sa Customs Port of Davao isip District Commander ug Area Supervisor sa Mindanao area.
Gumikan niini si Capt. Arizabal nga gikan sa Port of Davao maoy gihulip ni Casculan isip ESS District Commander sa Port of Cebu ug maoy supervisor sa Visayas area.
Atol sa turnover ceremony kagahapon sa hapon gisaksihan ni Cebu Customs District Collector (ret.) Gen. Roberto Almadin ug Atty. Paul Alcazaren ang Deputy Collector for Operation and Administration ug mga opisyal ug kawani sa Customs Police.
Si Arizabal mipadayag sa iyang kalipay nga nabalik sa dakbayan sa Sugbu isip District Commander sa Customs Police ug andam siyang mopadayon sa mga nasugdan ni Casculan ilabi na sa pagprotiher sa mga personnel ug propiyedad sa aduana. Makigtambayayong usab kini ngadto ni Almadin alang sa kalampusan sa tinguha niini nga target collection karong tuiga pinaagi sa pag-monitor sa illegal nga kalihukan sa mga smugglers sa nasud. (BANAT NEWS)