CEBU, Philippines - Patay ang usa ka babaye human kini nabanggaan sa usa ka multicab nga gimaneho sa usa ka lalaki nga padulong maghatod sa iyang uyab sa trabahoan sa dalan Escario sa barangay Kamputhaw sa dakbayan sa Sugbo sa miaging adlaw.
Ang suspek naila nga si Jaycee Villanueva Lastimosa, 20, molupyo sa dalan Katipunan, barangay Labangon sa dakbayan sa Sugbo.
Samtang ang biktima naila nga si Bernadeth Archival, 39, trabahante sa Cebu Doctors University Hospital Medical Clinics.
Ang suspek nagmaneho sa usa ka Suzuki multicab nga may plate number YFR 275 padulong nga maghatod sa iyang uyab ngadto sa IT Park sa barangay Lahug. Apan sa paglabay niini sa maong lugar giingong naatol usab nga mitabok ang biktima ug nadasmagan.
Ang mga sakop sa Emergency Rescue Unit Foundation mihatod ni Archival ngadto sa Vicente Sotto Memorial Medical Center apan gideklarar kini nga patay na.
Ang suspetsado kasamtangang natanggong sa Traffic Patrol Group samtang giandam ang kaso nga ipasaka kaniya. (/EIM)(BANAT NEWS)