CEBU, Philippines - Ang Cebu Beautiful Movement Foundation Inc.(CBMFI) magsugod na sa pag-apud-apod sa mga construction materials karong semanaha alang sa mga residente sa Amihanang Sugbo nga naigo sa super typhoon Yolanda.
Matud pa ni CBMFI co-chairman Margueritte "Margie" Lhuillier nga mao kini ang usa sa mga pamaagi sa pagtabang sa maong distrito.
Si magpapatigayon ug philantropist Mariquita Salimbangon-Yeung, kinsa mao usab ang CBMFI chairperson, nagkanayon nga unang hugna pa lang kini sa pagpanghatag nila og 6,000 ka sakong semento sa mga biktima.
Sulod sa duha ka adlaw (Nobiyembre 15 ug 16) nagpahigayon og medical missions sa Malapascua Island sa Daan Bantayan ug Medellin ang Mariquita Salimbangon-Yeung Charitable Foundation Inc., uban sa mga sakop sa CBMFI ug kapin 60 ka mga doktor. (BANAT NEWS)