CEBU, Philippines - Duha ka mga tawo ang patay samtang upat ang kritikal sa gihulagway nga sama og masaker. Ang suspek, bana sa usa sa mga anak sa nakalas nga ginang nga dugay nang gibiyaan.
Nahitabo kini sa sitio Hika, barangay Poblacion sa lungsod sa Compostela sa alas 11:00 sa miaging gabii.
Matud pa nga ang mga biktima nahinanok na sa ilang pagkatulog dihang misulod ang suspetsado nga si Antonio Ramon, 45, sa balay sa iyang ugangan.
Swerte nga didto sa pikas balay ang asawa ni Antonio nga si Annabelle Ramon dihang nahitabo ang krimen.
Apan girakrakan niini ang dughan sa natulog nga si Ozram Caesar, 46, ug ugangan nga si Apolonia Rabillas, 71, nga nakaangkon og samad pinusilan sa iyang ulo.
Samtang nangaangol sila si Lucilla Caesar, 43, ug si Yelda Mae Caesar, 18, naigo sa ilang tiyan samtang si Romeo Rabillas Jr., 32, samdan sa iyang tangkugo nga daling gipangdala sa Chong Hua Hospital.
Matud pa nga si Antonio gikataho nga hubog dihang naabot siya sa balay ug nangita sa iyang asawa nga si Annabelle.
Gikatahong gibiyaan sa iyang asawa ang suspek tungod sa kanunay niini nga pag-inom ug sa batasan niini.
Dunay usa ka anak ang magtiayon nga pito ka tuig pa lamang ug matud pa nga wala na sila mag-ipon sulod sa unom ka bulan.
Matud pa ni PO2 Arni Goc-ong, nga miresponde sa maong alarma nga nahinabi sa The Freeman/Banat News nga nagka-estorya pa ang magtiayon apan wala maabti og pila ka minuto naglalis na hinoon kini. “Diha ra sila sa gawas gaabot unya nagkabangi kay daan na man ni sila walay klarong tinagdan,†matud pa ni Goc-ong.
Milakaw si Antonio sa makadiyot apan mibalik kini dayon nga nagdala na og usa ka kalibre .45 pistola nga puno sa bala ug gipangita si Annabelle sa balay sa iyang mga ugangan.
Matud pa nga naglagot si Antonio dihang walay miabli sa balay hinungdan nga misulod kini sa gate ug giguba niini ang pultahan sa balay.
Nakig-estorya unta si Apolonia ni Antonio apan gipusil hinuon niya kini sa ulo ug gisunod sa pagpusil ang uban pang sakop sa panimalay ni Apolonia.
Misulay og eskapo ang suspetsado apan nasikop kini sa kapolisan.
Matud pa nga usa ka seaman si Antonio ug mouli lang matag tulo ka bulan kay mingawon kini sa iyang pamilya.
“Munaog lang kuno siya kay mingawon siya sa iyang pamilya,†matud pa ni Goc-ong. (/EIM)(BANAT NEWS)