CEBU, Philippines - Malaumon ang kapolisan sa dakbayan sa Sugbo nga mapasaka sa sunod semana ang kaso batok sa gunman ug utok sa pagpatay sa kanhi tigbalita ug tigpamaba sa Philippine Drug Enforcement Agency-7 nga si Jessie Tabanao.
Matud pa sa hepe sa City Intelligence Branch (CIB) Chief Inspector Romeo Santander nga may mga saksi nga positibo nga miila sa nagpusil kang Tabanao pinaagi sa hulagway niini nga ilang gipakita. Ang asawa ni Tabanao nga si Katrina mibisita kagahapon sa opisina ni Santander aron sa paghatag og importanteng mga kasayoran nga makatabang sa kapolisan sa pagsulbad sa maong kaso.
Sumala pa ni Santander, ang mga saksi mibutyag nga dunay tawo nga gikatagbo si Tabanao sa wala pa siya pusila.
“We have three witnesses who expressed their willingness to identify the gunman,†matud pa ni Santander.
Dihang nagkita na si Tabanao ug ang maong tawo giingong dunay miabot nga usa ka tawo sa atbang sa dalan Escario ug sa pagbiya sa kasabot ni Tabanao kalit nga milabang sa dalan ang bag-ohay miabot nga lalaki ug gidiretso sa pagpusil si Tabanao.
Matud ni Santander nga ang gunman mao ang hitman sa usa ka drug group nga nag-operate sa Central Visayas.
Miingon si Santander nga nailhan na usab nila ang tawo nga gikasabot ni Tabanao nga iyaha ra usab kaila, apan dako ang pagtuo sa kapolisan nga duna kini kalambigitan sa maong krimen tungod kay segundos lang gikan sa pagbiya niini dihang gipusil si Tabanao apan wala gyud kini mobalik aron moresponde ug tabangan si Tabanao. Si Santander miingon nga ang pagpatay kang Tabanao may kalambigitan gyud sa iyang trabaho isip usa ka operatiba ug tigpamaba sa PDEA.
“We assure Tabanaos to solve the case and justice will be given to them,†pulong pa ni Santander. (BANAT NEWS)