CEBU, Philippines - Namatay ang usa ka byuda human kini dasmagi og motorsiklo sa iyang paglabang sa karsada didto sa highway sa barangay Sto. Niño sa dakbayan sa Bogo sa miaging gabii.
Ang biktima mao si Victoria Balasuela, 81, byuda, ug molupyo sa maong lugar samtang ang dayber sa motorsiklo nga Honda XRM nga nakadasmag kaniya mao si Rovic Gesta, 19, nga taga barangay Cayang, dakbayan sa Bogo.
Si PO2 Zeniff Dungog sa Bogo City Police Station mibutyag sa Banat News nga ang biktima naglakaw sa karsada apan sa paglabang niini sa pikas daplin wa maglingi-lingi hinungdan nga wala kini makabantay nga may nagsingabot nga sakyanan.
Nasabak siya sa motorsiklo hinungdan nga nahagba sa karsada ug ang pagkapantok sa iyang ulo sa sementadong karsada maoy nakaingon sa iyang kamatayon.
Dali kining gidala sa tambalanan apan pag-abot didto sa Verallo District Hospital gideklarar nga dead on arrival (DOA) tungod sa grabeng kadaut sa ulo niini.
Samtang ang drayber sa motorsiklo mitahan usab dayon sa kapolisan ug nabalhug na karon sa karsel samtang gihikay ang tukmang sumbong nga ipasaka batok niya. (BANAT NEWS)