CEBU, Philippines - Nabulit sa mga samad dinunggaban ang nagkadaiyang parti sa iyang lawas ang usa ka private tutor human kini dunggaba patay sa usa ka liso og pangisip didto sa barangay Quiot, dakbayan sa Sugbo kagahapon sa alas 6:00 sa buntag.
Ang biktima nailhan nga si Mary Jane Villaflor Aguilos, hingkod, nga taga barangay Basak, San Nicolas ug usa ka giingong private tutor.
Samtang ang gitumbok nga suspetsado nailhan nga si Reagan Nacorda, 23, taga sitio Colis sa maong barangay.
Sa pakighinabi sa Banat News ni SPO4 Rogelio Cañete Jr. sa Police Station 10, nasayran nga samtang naglakaw ang suspek uban sa ig-agaw niini, nasugatan nila ang biktima nga nag-jogging.
Apan mikompisal ang suspek nga naglagot siya dihang gitutokan kuno og maayo sa biktima ang iyang ig-agaw nga si Marichu.
Busa gisundan sa suspek ang biktima ug dihang naapsan kini, gitusak-tusak dayon ang lawas sa iyang kutsilyo hangtod nga nahagba ang biktima ug gibiyaan sa suspek.
Gidala ngadto sa tambalanan ang biktima apan nakabsan kini sa kinabuhi paglabay sa duha ka oras.
Gipangita sa kapolisan ang suspetsado ug ila kining nadakpan didto sa ilang balay ug nagtingkagol na karon sa prisohan samtang giandam na ang kaso batok niini.
Dugang pa ni Cañete nga ang suspetsado adunay sakit nga nervous breakdown ug gani, niadtong milabay’ng buwan nadala na kini sa psychiatric ward. (BANAT NEWS)